جنوبی وزیرستان ؛ سیکیورٹی فورسز کا آپریشن،8 دہشتگرد ہلاک
سیکیورٹی فورسز نے جنوبی وزیرستان میں خفیہ اطلاعات پر کامیاب کارروائی کرتے ہوئے 8 دہشت گردوں کو ہلاک کردیا۔
پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق سیکیورٹی فورسز نے جنوبی وزیرستان کے علاقے سراروغہ میں انٹیلی جنس بیسڈ آپریشن کیا ، فائرنگ کے شدید تبادلے میں 8 دہشت گرد مارے گئے۔
آئی ایس پی آر کے مطابق ہلاک دہشتگرد فورسز اور شہریوں کے خلاف کارروائیوں میں ملوث تھے جبکہ آپریشن کے دوران ہلاک دہشت گردوں سے اسلحہ، گولہ بارود اور دھماکہ خیز مواد بھی برآمد کرلیا گیا ہیں۔
آئی ایس پی آر کا کہنا ہے کہ علاقے میں ممکنہ دہشتگردوں کے خاتمے کیلئے کلیئرنس آپریشن جاری ہے، پاکستان کی سیکورٹی فورسز دہشت گردی کی لعنت کے خاتمے کے لئے پرعزم ہیں۔
